Nýlega var karlmaður handtekinn í apóteki í Nancy í Frakklandi. Skömmu áður hafði eiginkona hans gengið inn í apótekið og sagt tvö orð sem á íslensku útleggjast: „Gríma 19.“ Það varð henni til bjargar.

COVID-19 faraldurinn hefur margvísleg áhrif um allan heim og ein þeirra er að margir eru nánast innilokaðir með mökum sínum öllum stundum. Þetta kemur sér auðvitað sérstaklega illa fyrir þá sem búa með maka sem beitir þá ofbeldi. Af þessum sökum hafa frönsk yfirvöld, að spænskri fyrirmynd, hvatt fórnarlömb heimilisofbeldis til að nota leyniorðin „Gríma 19“ í apótekum. Ef starfsfólk apóteka heyrir þessi orð á það, án þess að vekja athygli, að hafa samband við lögreglu og tilkynna um manneskju sem sé í mikilli hættu.

Samkvæmt frétt CNN var konan í Nancy fyrsti Frakkinn sem notaði leyniorðin tvö.

Margar rannsóknir hafa sýnt að atburðir, sem valda miklu álagi á fólk, geti valdið auknu heimilisofbeldi. Þetta hefur til dæmis sýnt sig við náttúruhamfarir, í fjármálakreppunni 2008 og þegar úrslitakeppnir í knattspyrnu fara fram.

Í kjölfar þess að Frakklandi var nær algjörlega lokað þann 17. mars hefur tilkynningum til lögreglu um heimilisofbeldi fjölgað mikið. Samkvæmt frétt Le Parisien er aukningin 36 prósent.

Franska ríkisstjórnin hefur ákveðið að greiða fyrir 200.000 gistinætur á hótelum fyrir fórnarlömb heimilisofbeldi. Auk þess hafa hjálparmiðstöðvar verið opnaðar í 20 stórmörkuðum víða um landið þar sem fórnarlömb heimilisofbeldis geta leitað aðstoðar.