Óveður gengur nú yfir Danmörku og Svíþjóð með tilheyrandi truflunum á daglegu lífi fólks. Eyrarsundsbrúin og Stórabeltisbrúin eru lokaðar fyrir allri umferð vegna mikils vinds. Í Svíþjóð eru um 80.000 heimili án rafmagns. Ferjusiglingar liggja niðri og lestarsamgöngur liggja víða niðri.

Sænska vegagerðin ráðleggur fólki að halda sig heima við nema brýna nauðsyn beri til að fara út. Vindhraðinn mældist allt að 34,9 metrar á sekúndu í Svíþjóð í gærkvöldi en fellibylsstyrkur er 32 metrar á sekúndu. Í nótt mældist vindhraðinn enn meiri eða 38,5 metrar á sekúndu.

Eyrarsundsbrúnni var lokað klukkan 3 í nótt og verður lokuð til klukkan 7 hið minnsta.

Reikna má með samgöngutruflunum fram eftir degi vegna veðurs og trjágróðurs sem hefur fokið og lent á vegum.