Lögreglan í Virginíu í Bandaríkjunum telur sig hafa handtekið mann sem myrti tvær ungar konur á hrottalegan hátt 1973. Lífsýni, sem fannst á morðvettvanginum, kom lögreglunni á slóð mannsins en hann er nú áttræður.

Samkvæmt frétt New York Post þá hefur maðurinn, Ernest Broadnax, búið í New York síðan á tíunda áratugnum.

Konurnar, sem hann er grunaður um að hafa myrt, voru í fríi og gistu á móteli í Virginíu þegar þær voru myrtar þann 20. júní 1973. Þær hétu Lynn Seethaler og Janice Pietopola og voru báðar 19 ára.

Pietopola var nauðgað, hún kyrkt og skotin þrisvar sinnum hægra megin í höfuðið. Seethaler var skotin í kinn og vínflösku lamið á háls hennar.

Broadnax virðist hafa skriðið inn um glugga á mótelinu til að komast inn í herbergi kvennanna.

Á næstu 12 árum voru átta konur til viðbótar myrtar á þessu sama svæði. Lögreglan telur að raðmorðingi hafi verið að verki og útilokar ekki að Broadnax hafi verið að verki. Öll fórnarlömbin voru á aldrinum 18 til 25 ára.