Hollenska lögreglan skaut karlmann til bana við Seðlabanka landsins í Amsterdam á áttunda tímanum í gærkvöldi. Maðurinn nálgaðist lögreglumenn með skotvopn á lofti og skutu þeir hann þá.

Þetta gerðist á litlum stíg aftan við bankann. Vegfarandi særðist en ekki hefur verið skýrt frá alvarleika meiðsla hans.

Lögreglan var kvödd á vettvang eftir að vegfarendur sáu til manns, með skotvopn, sem gekk um svæðið. Hollenskir fjölmiðlar hafa eftir sjónarvottum að um 20 skotum hafi verið hleypt af.

Ekki hefur verið skýrt frá hver sá látni er né af hverju hann var vopnaður á ferð við bankann.