Mennirnir fóru mikinn í næturlífinu í Óðinsvéum ásamt fleiri jólasveinum, eða frekar mönnum í jólasveinabúningi því eins og allir vita hegðar alvöru jólasveinninn sér ekki svona. Tvímenningarnir réðust á 25 ára mann og lömdu hann og spörkuðu í hann. Þá gripu dyraverðir inn í og handsömuðu þá og héldu þar til lögreglan kom á vettvang.
TV2 Fyn segir að jólasveinarnir hafi komið úr nokkrum bæjum á Fjóni en það er árleg hefð að þeir hittist og borði jólamat saman einu sinni á þessum annasama tíma jólasveina. Þetta er að sögn ekki í fyrsta sinn sem jólasveinarnir eru til vandræða í desember. Talsmaður lögreglunnar sagði að það hafi verið árvisst frá 2011 að jólasveinarnir séu til vandræða þegar þeir hittast og borða saman þessa einu kvöldstund.
