CNN skýrir frá þessu. Fram kemur að 39.773 hafi verið skotnir til bana í Bandaríkjunum á síðasta ári. Þetta mikil aukning frá 1999 en þá voru 28.874 skotnir til bana og þótti flestum nóg um þá. Það verður að fara allt aftur til 1979 til að finna álíka tölur um fjölda fórnarlamba og á síðasta ári.
Tölurnar ná yfir morð, sjálfsvíg, slysaskot og mannfall í stríði. CNN segir að 23.854 hafi tekið eigið líf á síðasta ári með því að nota skotvopn.
Að meðaltali létu því 109 manns lífið á degi hverjum af völdum skotvopna segir Adelyn Allchin, formaður Educational Fund to Stop Gun Violence, og bætir við að hér sé um stórt samfélagsvandamál að ræða. Hún segir að skotvopn hafi alltof lengi verið stór hluti af hversdagslífi Bandaríkjamanna og kominn sé tími til að kjörnir leiðtogar þjóðarinnar taki höndum saman til að sporna gegn þessari óheillavænlegu þróun.
Það þarf kannski ekki að koma á óvart að hjá hinum gríðarlega áhrifamiklu hagsmunasamtökun National Rifle Association, NRA, eru menn ekki á sama máli og sjá ekkert tilefni til að herða vopnalöggjöfina þrátt fyrir þessar skelfilegu tölur.
Á Twitter skrifuðu samtökin að það væri ekki lausn á málinu að herða skotvopnalöggjöfina. Ef koma eigi í veg fyrir fleiri skelfileg ofbeldisverk verði stjórnmálamenn að hætta að skrímslavæða karla og konur í NRA og setja fram lausnir sem geta bjargað mannslífum.
