Samtök gyðinga í Umeå í Svíþjóð hafa ákveðið að hætta starfsemi í bænum eftir að hafa þurft að þola hótanir og skemmdarverk í eitt og hálft ár. Þetta þýðir að nú eru engin samtök gyðinga starfandi í Svíþjóð norðan við Uppsala. Nú fer öll félagsstarfsemi gyðinga fram í syðsta þriðjungi landsins.

Kristeligt Dagblad skýrir frá þessu. Þar er haft eftir Aron Verständig, formanni miðstjórnar gyðinga í Svíþjóð, að þetta sé mikið áfall fyrir sænska gyðinga. Nú geti gyðingar í norðurhluta landsins ekki lengur sótt samkomur og félagsstarf á vegum gyðinga. Í suðurhlutanum þýði þetta að þar verði gyðingar að auka útgjöld til öryggismála.

Carinne Sjöberg, sem var formaður samtakanna í Umeå, segir að það hafi aðallega verið nasistar sem stóðu á bak við hótanirnar. Hún segir að skemmdarverk hafi verið unnin á húsnæði samtakanna, orðið „Hitler“ hafi verið málað á það og fólk hafi hengt andgyðingleg spjöld upp. Auk þess var hakakross málaður á húsið og ógnandi skilaboð á borð við: „við vitum hvað þið búið“.

Hún segir að fólk hafi óttast um öryggi barna sinna og sveitarfélagið hafi ekki viljað láta samtökunum annað húsnæði í té eftir þessar hremmingar og því hafi samtökin neyðst til að hætta starfsemi.

„Þetta er sorglegur ósigur, að nasistarnir fái að sigra.“

Í Malmö og Gautaborg hafa gyðingar einnig sætt ofbeldi, hótunum og skemmdarverkum. Í desember var bensínsprengjum kastað á bænahús gyðinga í Gautaborg. Hópur manna frá Miðausturlöndum er grunaður um það og á von á ákæru fyrir.