Snædís Jónsdóttir matreiðslumaður mælir með að fólk prófi sig áfram og skoði nýjar uppskriftir um helgina. Hér er komin spennandi útfærsla á lambabóg sem sómir sér vel á helgarborðinu. Maísinn er algert dúndur og því má vel gera tvöfalt magn af honum.

Marokkósk lambaveisla 

Fyrir 4  – eldunartími: 2 ½ klst.

1 lambabógur
3 msk. ras el hanout krydd
½ tsk. harissa krydd
1 tsk. lamb Islandia krydd
2 hvítlauksgeirar rifnir
2 tsk. salt
2 msk. olía

Hitið ofninn í 210°C, blandið hvítlauk, olíu og kryddi í skál.
Nuddið kryddblöndunni vel á lambabóginn. Setjið bóginn í eldfast mót og brúnið kjötið í 10-15 mínútur, lækkið hitann í 80°C og eldið í 2 klst.

Chimichurri-sósa

1 búnt kóríander
1 búnt steinselja
2-3 hvítlauksgeirar
½ jalapeno
150 g olía
1 tsk. hunang
1 msk. edik
Salt

Allt maukað saman í matvinnsluvél eða með töfrasprota og smakkað til með salti.

Einnig hægt að saxa allt fínt og blanda saman í skál.

Grillaður maís með graslauks- og hvítlauksmajónesi

2 heilir, forsoðnir maísstönglar
2 dl japanskt majónes
½ búnt graslaukur heill
½ búnt graslaukur, saxaður
1 hvítlauksgeiri
50 g sólblómafræ
Bráðið smjör
Salt

Hitið ofninn í 160°C. Setjið sólblómafræ á bakka og ristið í ofninum í 5 mínútur.
Penslið smjörinu á og saltið maísinn.
Eldið maísinn á grilli, grillpönnu eða í ofni, á öllum hliðum.
Setjið japanskt majónes, graslauk og hvítlauk í matvinnsluvél eða notið töfrasprota og blandið vel, smakkið til með salti.

Penslið maísinn aftur með smjöri. Setjið ögn af majónesi, sólblómafræ og saxaðan graslauk yfir.