Fyrrverandi YouTube stjarna hefur verið dæmd í fimmtán mánaða fangelsi fyrir að hafa gefið heimilislausum manni Oreo kex sem var fyllt með tannkremi. Hann var dæmdur fyrir að brjóta gegn siðferðilegri friðhelgi mannsins. Atvikið átti sér stað í Barcelona.
Kanghua Ren var nítján ára þegar hann tók „áskorun“ á YouTube og skipti út venjulegu kremfyllingunni á Oreo fyrir tannkrem. Hann gaf síðan heimilislausum manni, Gheorge L., kexið ásamt um 2700 krónum. Gheorge ældi eftir að hafa borðað kökuna og sagði við spænska dagblaðið El Pais að hann „hafi aldrei þurft að þola eins slæma framkomu þegar hann hefur búið götunni.“
Síðastliðinn föstudag ákváðu dómstólar í Barcelona að Kanghua Ren ætti að loka öllum samfélagsmiðlum sínum, þar á meðal YouTube rás sinni, og dæmdu hann til fimmtán mánaða fangelsisvistar. Það er þó ólíklegt að hann muni dvelja einn dag í fangelsi þar sem að þetta er hans fyrsta brot og ekki ofbeldisbrot. Hann á að borga fórnarlambi sínu tæplega 2,8 milljónir krónur.
Myndbandið vakti hörð viðbrögð þegar Kanghua Ren deildi því fyrst á YouTube með 1,2 milljón fylgjendum sínum. Vegna neikvæðu viðbragðanna fór hann aftur til Gheroge L., heimilislausa mannsins, og bauð honum aðrar 2700 krónur. Hann bauð síðan dóttur Gheorge rúmlega 41 þúsund krónur fyrir að kæra hann ekki. Times greinir frá.
Við réttarhöldin sagði Kanghua: „Ég geri hluti til að sýnast. Fólk er hrifið af því sem er sjúklegt.“