Eins og lesendur matarvefsins hafa eflaust tekið eftir höfum við tekið þekkta Íslendinga tali uppá síðkastið og innt þá eftir eftirminnilegum jólaminningum tengdum mat.

Sigríður Elín Ásmundsdóttir er ritstýra tímaritsins Hús og Híbýli og það stendur ekki á svörunum þegar hún er spurð út í matartengda minningu á jólum.

„Ég eyddi einum jólum hjá gyðingafjölskyldu í New York sem heldur ekki jól. Jólabarnið ég fór þá með fjölskyldunni í skíðaferð og eyddi aðfangadegi í snjóhvítum skíðabrekkum. Ég átti von á steik í tilefni dagsins, það var nú einu sinni aðfangadagur hjá íslensku au pair-stelpunni,“ segir Sigríður Elín. Það varð þó ekki raunin.

„Nei, aldeilis ekki neitt í líkingu við steik því þegar við komum upp á hótel var pöntuð pítsa og heitt kakó með henni!“

Ritstýran segir þessa stund hafa markað hennar jólahald síðan.

Sjá einnig: Blóðugur aðfangadagur Kolbrúnar Pálínu: „Í dag ber ég þetta fína jólaör“.

„Þetta var furðulegasti aðfangadagsmatur sem ég hef upplifað og síðan þá hef ég lagt mikið upp úr að fá eitthvað alveg spes á jólunum og ég drekk malt og appelsín en ekki kakó með jólamatnum.“