Fjölmiðillinn Big 7 Media hefur valið fimmtíu bestu borgara heims, en á listanum eiga Íslendingar fulltrúa. Í 31. sæti á listanum er hamborgarinn á Block Burger á Skólavörðustíg í Reykjavík. Í umsögn um borgarann stendur:

„Almennileg borgarabúlla sem einblínir á að búa til heimsklassa borgara. Engin þörf á alls kyns áleggi eða stórum skömmtum. Bara hæfilega stór borgari sem tikkar í öll boxin.“

Ef lýsa ætti hamborgurunum á Block Burger í aðeins einu orði þá væri það orðið ferskleiki. Kjötið í borgurunum er sérvalið 100% íslenskt úrvals ungnautakjöt sem hefur fengið hámarksmerjun við bestu aðstæður. Kjötið sem Block Burger fær afhent frá sínum framleiðanda er síðan skorið niður, hakkað og búnar til úr því 120 gramma kúlur sem fara í hamborgarana á staðnum. Ferskara og gæðameira verður hamborgarakjöt ekki. Hamborgarabrauðin koma daglega og eru sérbökuð fyrir Block Burger. Annað sem gefur Block Burger-hamborgurunum sérstöðu er Block-sósan sem gerð er á staðnum.

Block Burger hóf starfsemi í ágúst árið 2015 og er á sama stað og veitingastaðurinn Grænn kostur var áður, eða í bakhúsi að Skólavörðustíg 8. Opið er alla virka daga frá kl. 11 til 21 og um helgar frá kl. 12 til 21.

Borgari vikunnar

Oft er líka í boði borgari vikunnar. Þar má nefna hamborgara eins og Bearnaise Block, BBQ Block, Monkey Block sem er með hnetusmjöri og banönum, Double Cheese Block og fleiri. Margt spennandi er framundan í þessum sérréttum en fólk getur fylgst með borgara vikunnar á Facebook-síðu og Instagram-síðu Block Burger.