Spennandi sýningar fram undan á Sögulofti Landnámsseturs
Grettir og Auður djúpúðga snúa aftur og tvær sýningar bætast við.
Grettis saga Einars Kárasonar og Auðar saga Vilborgar Davíðsdóttur hafa notið gífurlegra vinsælda á Sögulofti Landnámssetursins í Borgarnesi. Sýningum átti að ljúka í haust en til að koma á móts við þá sem þurftu frá að hverfa verða nokkrar sýningar eftir áramót. Auk þess verða tvær nýjar sýningar frumsýndar á Söguloftinu; FARÐU Á ÞINN STAÐ eftir Theodór Þórðarson (Tedda löggu) og Njálssaga Bjarna Harðarssonar.
Auðar saga djúpúðgu
Vilborg Davíðsdóttir heillaði áhorfendur upp úr skónum þar sem hún lagði með þá í ferðalag um slóðir Auðar djúpúðgu á Bretlandseyjum og í kjölfarið til eylandsins á enda veraldar. Saman við viðburðaríkt líf Auðar á Írlandi og Skotlandi fléttast atburður sem markaði upphaf landnámsins blóði: þrælauppreisn á suðurströnd Íslands. Sýningar í febrúar.
laugardagur 2. febrúar kl. 20.00
sunnudagur 3. febrúar kl. 16.00
laugardagur 16. febrúar kl. 20.00
sunnudagur 17. febrúar kl. 16.00
sunnudagur 10. mars kl. 16.00
Grettis saga Einars Kárasonar
Einar er sá listamaður sem hefur verið með flestar frumsýningar í Landnámssetrinu. Þetta er hans sjötta sýning en mörgum er enn í fersku minni frábær flutningur hans á Skáldinu Sturlu og Óvinafagnaði.
„Það sem Einar gerir best er hvernig hann tekur söguna saman, þjappar henni þannig að hún rúmist á tveim tímum og hvernig hann – um leið og hann styttir – túlkar hana og opnar hana fyrir manni án þess að fara nokkurn tíma offari í skýringum.“ (Silja Aðalsteinsdóttir TMM) Sýningar í janúar.
laugardagur 12. janúar kl. 20.00
sunnudagur 13. janúar kl. 16.00
laugardagur 9. febrúar kl. 20.00
sunnudagur 10. febrúar kl. 16.00
Farðu á þinn stað
Tedda löggu þarf ekki að kynna fyrir Borgfirðingum og margir landsmenn þekkja hann úr Laufskálanum í útvarpinu. Í þessari sýningu tekur hann sjálfan sig til kostanna í sjálfsævisögulegum einleik þar sem ferðast er frá Kínahverfinu í Borgarnesi og alveg út á Ystu Nöf, þar sem hann nú býr. Hann rekur í máli og myndum ýmis atvik í samskiptum sínum við samferðafólk sitt, allt frá barnæsku og fram til vorra daga. Frumsýnt í janúar.
laugardagur 19. janúar kl. 20.00 forsýning
laugardagur 26. janúar kl. 20.00 frumsýning
laugardagur 27. janúar kl. 16.00
föstudagur 1. febrúar kl. 20.00
laugardagur 16. febrúar kl. 16.00
laugardagur 23. febrúar kl. 20.00
sunnudagur 24. febrúar kl. 16.00
Njála Bjarna Harðarsonar
Bjarni Harðarson flytur sína Njálu þannig að nýr skilningur mun vitrast þeim sem eru reiðubúnir að opna bæði hug og hjarta fyrir fagnaðarerindinu.
Sunnlendingurinn Bjarni er alinn upp með Njálu sér við hjartastað. Hann þykist því þess umkominn að tala eins og sá sem valdið hefur þegar kemur að því að rýna og túlka þessa bók bókanna í íslenskri miðaldamenningu. Komið og ykkur mun opnast ný Íslandssaga. Frumsýnt í mars.
laugardagur 2. mars kl. 20.00 frumsýning
sunnudagur 3. mars kl. 16.00
laugardagur 16. mars kl. 20.00
sunnudagur 17. mars kl. 16.00
Það er einfalt að kaupa gjafabréf á sýningarnar á Söguloftinu og hægt að bæta við kvöldverði sem gerir upplifunina enn eftirminnilegri. Best er að senda tölvupóst á landnam@landnam.is en einnig er hægt að kaupa miða á heimasíðu Landnámsseturs: www.landnam.is/viðburðir
„Fyrirbærið Söguloft er einstakt á heimsvísu, það þori ég að fullyrða, og starfsemin þar blómstrar, sem betur fer.“ (Silja Aðalsteinsdóttir TMM).