Þann 9. febrúar árið 1977 birti dagblaðið Dagur frétt um að svartur maður hefði sést á bænum Gunnarsstöðum í Þistilfirði deginum áður.
Var fyrirsögninni „Negri í Þistilfirði“ slegið upp en aðalinntak fréttarinnar var reyndar að nokkuð mikill snjór væri í sveitinni og þungfært.
Þrátt fyrir snjóþyngslin færu menn milli bæja, spiluðu og ættu góðar samverustundir.
Fréttaritara þótti það þó sæta tíðindum að hjá einum bónda, Jóhannesi Sigfússyni, væri vetrarmaður frá Gana, Stephen Ato að nafni. Sjaldgæft væri að sjá svartan mann í slíkum snjó.
„Þetta er kátur maður og er að venjast störfunum. En einn hlut óttast hann, og það er dýpt snjóskaflanna, sem hann álítur, að hann muni e.t.v. festast í og ekki komast upp aftur.“ Ato var 32 ára landeigandi sem var að búa sig undir kjötframleiðslu svína og sauða.