Sá hraði og mikla áreiti sem fylgir nútímasamfélagi, ekki síst vegna óheyrilegs magns upplýsinga sem dynur á okkur allan sólarhringinn, hefur sett mark sitt á marga einstaklinga, sem margir eiga erfitt með að finna innri ró, og þar sem margir einstaklingar koma saman fer oft ekki mikið fyrir rólegheitum. Börn í 4. bekk í Egilsstaðaskóla hafa greinilega orðið vel vör við þessa þróun og hafa farið þess formlega á leit við sveitarstjórn Múlaþings, sem Egilsstaðir eru hluti af, að komið verði upp sérstökum og afmörkuðum stað í bænum þar sem ríki friður og ró.
Þetta er meðal átta hugmynda sem bekkurinn sendi nýlega í formlegu bréfi til sveitarstjóra Múlaþings, Dagmarar Ýrar Stefánsdóttur. Hugmyndirnar snúa allar að því hvernig börnin telja að megi bæta nærumhverfi þeirra.
Bréfið var tekið fyrir fyrr í vikunni á fundi umhverfis- og framkvæmdaráðs sveitarfélagsins og er bréf barnanna birt með fundargerð fundarins.
Í þessu bréfi 4. bekkjar í Egilsstaðaskóla kemur fram að nýlega hafi bekkurinn rætt um lýðræðislegar kosningar og hvernig nemendur geti haft áhrif á nærumhverfi sitt. Segir í bréfinu enn fremur að í tíma í lífsleikni hafi farið fram kosning í bekknum um þær hugmyndir sem nemendur teldu að myndu bæta umhverfi þeirra mikið. Átta hugmyndir hafi orðið fyrir valinu.
Þær eru í fyrsta lagi að bæta snjómokstur á gangstéttum:
„Það er ekki gott að þurfa að labba á götunni þegar það er mikill snjór eða ruðningar.“
Þar að auki leggja börnin til að settir verði upp fleiri vatnskranar við íþrótta- eða leikvelli, tjörn í hinum svokallaða Tjarnargarði verði hreinsuð, komið verði upp betri körfuboltavelli í Fellabæ, sem er næsti þéttbýliskjarni við Egilsstaði, sömuleiðis að fleiri leikvellir verði gerðir í bænum sem henti þessum aldurshóp, vísindi verði námsgrein í skólanum og loks að skautasvellið í bænum verði stækkað og komið verði upp fleiri hjálpargrindum við hana.
Að lokum leggja börnin fram hugmynd sína um aukna ró í bænum:
„Afmarkaður staður á Egilsstöðum þar sem ríkir friður, ró og hæglæti. Það væri hægt að setja upp skilti og hvetja fólk til hæglætis og rólegheita, að það væri bannað að vera með læti á þessu svæði.“
Ljóst er að auk áðurnefndra ástæðna fyrir því að erfitt er að finna ró í nútíma samfélagi þá verður oft háreysti og læti þar sem mörg börn koma saman og þessi beiðni 4. bekkjar Egilsstaðaskóla markast án efa af því.
Í lok bréfsins segja börnin að þau telji þessar hugmyndir sínar munu hafa jákvæð áhrif á samfélagið þeirra og bæta lífsgæði bæði barna og fullorðinna. Þau segjast vonast til að sveitarfélagið geti tekið fyrstu skrefin í þá átt að láta þessar hugmyndir verða að veruleika og bjóða fram aðstoð sína við það, ef þörf krefji:
„Við þökkum ykkur fyrir að taka okkur alvarlega og hlökkum til að heyra frá ykkur.“
Í fundargerð þessa fundar umhverfis- og framkvæmdaráðs Múlaþings kemur fram að samþykkt hafi verið að fela framkvæmda- og umhverfismálastjóra að svara erindi 4. bekkjar Egilsstaðaskóla í samræmi við umræður á fundinum. Ekkert kemur fram í fundargerðinni um á hvaða nótum rætt var um erindið og það á því eftir að koma í ljós hvort að á Egilsstöðum verði komið upp afmörkuðum stað þar sem hægt verði að upplifa meiri ró og hæglæti.
