Landsréttur hefur snúið við dómi Héraðsdóms Reykjavíkur og úrskurðað að kennari í grunnskóla skuli fá skaðabætur úr ábyrgðatryggingu vinnuveitanda síns hjá tryggingafélaginu VÍS. Kennarinn slasaðist árið 2017 eftir árás nemanda í matsal grunnskóla nokkurs.
Atvikinu og afleiðingunum er lýst þannig í dómi Landsréttar:
Aðdragandi árásarinnar var sá að nemandinn var að elta yngri nemanda í matsalnum og rétti kennarinn út höndina til að fá nemandann til
að hætta hlaupunum. Viðbrögð nemandans voru að kýla kennarann með krepptum hnefa í vinstri kjálka. Kennarinn greip þá um miðbúk nemandans aftan frá, hélt honum með bak hans í bringu hennar og kom nemandanum út úr matsalnum. Féll kennarinn eftir átök við nemandann og lenti á tröppum. Mun nemandinn þá hafa náð að skalla kennarans í andlitið þannig hún vankaðist. Samkvæmt örorkumati var örorka kennarans metin 10%.
Niðurstaða héraðsdóms var í stuttu máli á þá leið að viðbrögð kennarans í aðstæðunum hefðu verið röng og því var tryggingarfélagið sýknað af kröfunum.
Landsréttur sneri við dómi héraðsdómstólsins, eins og áður segir, en í dómnum var meðal annars deilt um hvort að þau viðbrögð kennarans að rétta út höndina til að stöðva nemandann hafi falið í sér „líkamlegt inngrip í refsingarskyni.“ Landsréttur taldi svo ekki vera, kennarinn hafi með réttu
talið ítrustu neyð fyrir hendi, enda hafi háttsemi nemandans leitt af sér mikla hættu fyrir hana og hugsanlega einnig fyrir samnemendur og annað starfsfólk.
VÍS ber því að greiða kennaranum skaðabætur úr ábyrgðartryggingu vinnuveitandans.
