Öllum sjómönnum hjá sjávarútvegsfyrirtækinu Einhamar Seafood í Grindavík var sagt upp um síðustu mánaðamót. Skýringin er sögð skipulagsbreytingar og hækkun veiðigjalda eru sögð hluti af ástæðunni. RÚV greinir frá.

Sjómenn hjá fyrirtækinu eru alls 20 og sem fyrr segir var þeim öllum sagt upp. „Manni verður alltaf illt í hjartanu þegar sjómönnum er sagt upp. Þetta tekur alltaf á mann,“ segir Einar Hannes Harðarson, formaður Sjómanna- og vélstjórafélags Grindavíkur, í viðtali við RÚV.

Einar hefur eftir forstjóra og eiganda Einhamas, Stefáni Kristjánssyni, að skipulagsbreytingar valdi þessar ákvörðun og hækkun veiðigjalda spili inn í. Einar segir þetta vera fyrirslátt og telur að það vaki fyrir Stefáni að fara inn í svokallaða 14 tíma reglu en hún felur í sér að ekki þurfi vélstjóra um borð. Verið sé að breyta launakjörum úr hálfum hlut í einn, sem spari fyrirtækinu yfir 50 milljónir króna á ári.

„Ef hann fer yfir fjórtán tímana er þetta ólögleg skráning um borð í bátnum,“ segir Einar og bætir við að þungt hljóð sé í félagsmönnum. Vill hann  meina að túrarnir sé ávallt lengri en 14 tímar.

RÚV náði ekki sambandi við eiganda Einhamars við vinnslu fréttarinnar sem lesa má hér.