Páll Magnússon, fyrrverandi fjölmiðlamaður og þingmaður, greinir frá því á samfélagsmiðlum að hann hafi fengið rukkun frá Skattinum. Hljóðaði hún upp á heilar 7 krónur íslenskar.

„Ég fékk ábúðarmikið þriggja síðna bréf frá Skattinum um daginn: úrskurð um endurálagningu fyrir gjaldárið 2023,“ segir Páll, sem er í dag forseti bæjarstjórnar Vestmannaeyjabæjar.

Kom þetta Páli í opna skjöldu og varð hann áhyggjufullur.

„Ég kipptist við; hverju hef ég nú klúðrað? Hugsaði endurskoðandanum þegjandi þörfina – og fór strax að pæla í hvað ég gæti selt til að borga þetta,“ segir Páll. „Svo þrælaði ég mér í gegnum torfið: “Með úrskurði þessum hefur ríkisskattstjóri hrint í framkvæmd boðuðum breytingum” Niðurstaða: Samtals hækkun 7 – sjö – krónur.“

Í hæðnistóni segist að lokum: „Ég krefst þess að fá að skipta greiðslunni í tvennt!“