Persónuvernd er að skoða mál sem snýr að kvörtun ónefnds blaðamanns Mannlífs varðandi meint hagsmunatengsl Stefáns Einars Stefánssonar, blaðamanns Morgunblaðsins, til Fjölmiðlanefndar. Kvörtunin var vegna umfjöllunar Stefáns Einars um ferðalag sitt til Champagne-héraðs í Frakklandi í september 2023 en ósagt var látið að greinarhöfundur átti þá og rak fyrirtæki, Kampavínsfjelagið og co.  sem flutti inn og seldi kampavín, sem sum hver voru til umfjöllunar í greininni. Rétt er að geta þess að Stefán Einar seldi fyrirtækið á dögunum.

Taldi kvartandinn að umfjöllunin bryti í bága við fjölmiðlalög um dulin viðskiptaboð fyrir áfengi. Fjölmiðlanefnd bauð blaðamanninum að vera undir nafnleynd en eftir kröfu Árvakurs hf., útgáfufélags Morgunblaðsins, sem studd var lagarökum, taldi nefndin sér skylt að gefa nafn kvartandans upp. Var það gert síðan þrátt fyrir mótmæli blaðamannsins sem sagði það hafa fælingaráhrif á kvartanir til framtíðar.

Málið er rakið í frétt á vef Mannlífs en þar kemur fram að viðkomandi hafi leitað til umboðsmanns Alþingis vegna málsins en álit hans hafi verið á þá leið að Fjölmiðlanefnd hafi mátt afhenda nafn hans til Árvakurs.

Þaðan fór kvartandinn til Persónuverndar og sendi kvörtun þangað fyrir fjórum mánuðum síðan. Hefur Persónuvernd krafið Fjölmiðlanefnd svara við nokkrum spurningum sem skulu berast eigi síðar en 10. febrúar næstkomandi.

Varðandi kvörtunina almennt var það niðurstaða Fjölmiðlanefndar að umfjöllun Stefáns Einars bæri ekki að öllu leyti merki þess að vera dulin viðskiptaboð í skilningi laga um fjölmiðla og viðskiptaboð fyrir áfengi.