Sigurður Ingi Jóhannsson fjármálaráðherra segir að það myndi rústa íslenskum landbúnaði ef ákveðið yrði að afnema tolla á innflutt matvæli.

Viðskiptaráð Íslands segir að afnám tolla myndi lækka verð á matvörum um allt að 43%, en ráðið gerði úttekt á áhrifum afnáms tolla á dögunum. Írskar nautalundir myndu lækka um 37%, Mozzarella ostur um 38% og danskar kjúklingabringur um 43% svo örfá dæmi séu tekin.

Sigurður Ingi segir við Morgunblaðið í dag að honum finnist það vera einföldun hjá Viðskiptaráði að leggja þetta til. Tollar séu notaðir í allflestum ef ekki öllum löndum til að tryggja og vernda innlenda framleiðslu og búa til virðisauka í landinu þar sem vörurnar eru framleiddar.

„Hluti af því er að tryggja fæðuör­yggi og þetta er líka full­veld­is­mál. Ísland er land þar sem land­búnaðar­af­urðir eru í mjög háum gæðaflokki,“ segir hann.

Aðspurður hvort það skipti engu að afnám tolla af innfluttum matvörum myndi leiða til umtalsverðrar lækkunar á vöruverði, neytendum til hagsbóta, segir Sigurður Ingi:

„Um leið myndi það rústa ís­lensk­um land­búnaði og lifi­brauði þeirra þúsunda manna sem hafa at­vinnu sína af hon­um. Einnig byggð í land­inu og slíkt myndi hafa æv­in­týra­lega rösk­un í för með sér. Ég er ekki viss um að heild­aráhrif­in af slíkri aðgerð yrðu já­kvæð.“