Donald Trump, fyrrverandi Bandaríkjaforseti, sneri bakinu við Jeffrey Gunter sem hann skipaði sem sendiherra á Íslandi. Trump lýsti yfir stuðningi við mótherja hans, Sam Brown, í heitu prófkjöri í Nevada.
„Sam Brown er hræðslulaus amerískur föðurlandsvinur, sem hlotið hefur purpurahjartað, sem sýnt hefur að hann hefur staðfestu og hugrekki til að kljást við óvini okkar, bæði erlenda og innlenda,“ skrifaði Trump á samfélagsmiðla til stuðnings Sam Brown.
Prófkjörið á milli Brown og Gunter til að fá að vera frambjóðandi Repúblíkanaflokksins um annað öldungardeildarsætið í Nevada hefur verið sérstaklega ófyrirleitið og jafnt. Í skoðanakönnun mældust þeir báðir með 41 prósent. Báðir frambjóðendur hafa sóst hart eftir stuðningsyfirlýsingu frá Trump.
Fyrirfram hefði mátt ætla að Gunter væri í betri stöðu þar, þar sem Trump skipaði hann sendiherra á Íslandi. Hins vegar fór allt í háaloft í sendiherratíð Gunter hér, bæði gagnvart Íslendingum og eigin starfsfólki. Eftir að Gunter sneri heim var skrifuð kolsvört skýrsla í bandaríska utanríkisráðuneytinu um sendiherratíð hans sem sendiherra.
Sam Brown er fyrrverandi hermaður, sem barðist í stríðinu í Afganistan. Hann hlaut brunasár á 30 prósent líkamans eftir sprengingu árið 2008. Hann hefur áður sóst eftir að vera frambjóðandi í þingkosningum en ekki hlotið erindi sem erfiði. Brown þakkaði Trump fyrir stuðningsyfirlýsinguna.
„Þakka þér Trump forseti, fyrir leiðtogahæfnina og stuðningsyfirlýsinguna. Ég hlakka til að vinna með þér að gera framtíð Nevadabúa bjarta eftir að við vinnum báðir í nóvember,“ sagði Brown.
Gunter brást einnig við þessum tíðindum en kenndi Mitch McConnell, leiðtoga Repúblíkanaflokksins í minnihluta öldungardeildar, um. „Mitch McConnell peningarnir vinna, amerískur almenningur tapar. Hreinsa og endurtaka,“ sagði hann við fréttastofuna Fox News.
