Helga Þórisdóttir, forstjóri Persónuverndar, boðaði nú í hádeginum til blaðamannafundar á heimili sínu en yfirlýst efni fundarins var samtal um embætti forseta Íslands. Eins og búist var við tilkynnti Helga á fundinum um framboð sitt í komandi forsetakosningum.

Í frétt Vísis af fundinum segir að Helga hafi farið ítarlega yfir starfsferil sinn og sagt hann hafa snúið alfarið að þjónustu við almannahagsmuni. Hún hafi starfað hjá embætti ríkissaksóknara, á nefndasviði Alþingis, hjá EFTA í Brussel, menntamálaráðuneytinu og Lyfjastofnun en síðustu átta ár hafi hún verið forstjóri Persónuverndar.

Einnig kemur fram að Helga hafi sagst brenna fyrir hagsmunum íslensku þjóðarinnar og þess vegna bjóði hún fram reynslu sína, þekkingu og einlægni til þess að gegna hinu mikilvæga embætti forseta Íslands.

Helga hefur þar með bæst í hóp þeirra sem tilkynnt hafa opinberlega um framboð sitt. Á Ísland.is eru þegar þessi orð eru rituð nöfn 54 einstaklinga, þar á meðal nafn Helgu, sem eru að safna meðmælum fyrir forsetaframboð en ekki hafa allir frambjóðendur tilkynnt opinberlega að þeir séu í framboði og einnig hefur komið fram að sumir sem eru á listanum hafi endað þar fyrir slysni.