Eins og fram hefur komið er verið að hleypa heitu vatni á ný inn í hús á Suðurnesjum. Í nýrri tilkynningu á vef HS Veitna segir að þess vegna þurfi íbúar að huga að ýmsu.

Gott sé að viðskiptavinir hafi hitastilla lágt stillta og hækki ekki hitann fyrr en ofnar eða gólfhitakerfi byrji að hitna, og hækki síðan hitastilla í rólegheitunum í nokkrum þrepum. Miðstöðvarkerfi fasteigna geti hafa orðið fyrir frostskemmdum í heitavatnsleysinu og séu viðskiptavinir beðnir að fylgjast vel með inntaksrými og öðrum lögnum, nú þegar heitu vatni er hleypt á að nýju.

Ef heitt vatn skili sér í vaskinn þá sé komið heitt vatn inn á kerfið og sé þá gott að yfirfara hvort leki kunni að vera við inntaksrými eða í grind.

Verði viðskiptavinur varir við leka, eða viti nú þegar af frostskemmdum í lögnum, sé mikilvægt að loka fyrir aðalinntakið við hitaveitugrindina og tilkynna það til þjónustuvers HS Veitna í síma 422-5200 eða á netfangið hsveitur@hsveitur.is.

Píparasveit Almannavarna og starfsfólk HS Veitna muni aðstoða viðskiptavini eftir bestu getu í dag og næstu daga. HS Veitur beri ábyrgð á lögnum að mæli og muni sjá um viðgerð á þeim, en lagnir fyrir innan mæli séu eign og á ábyrgð húseigenda.