Flóki Invest er eignarhaldsfélag sem er hluti af svokallaðri Aztiq-samstæðu sem er stofnandi og stærsti hluthafinn í Alvotech. Flóki Invest hefur nú skrifað undir viljayfirlýsingu ásamt fasteignafélaginu Heimar um uppbyggingu og starfsrækslu allt að þriggja nýrra leikskóla á höfuðborgarsvæðinu. Staðsetning leikskólanna verður ákveðin í samráði við sveitarfélög og hagsmunaaðila og er stefnt á að uppbygging hefjist á fyrsta ársfjórðungi 2025 og að leikskólarnir verði komnir í rekstur á næstu 3-5 árunum.

Í tilkynningu segir að Alvotech, eins og mörg önnur fyrirtæki, standi frammi fyrir því að skortur á leikskólaplássi hefur áhrif á starfsfólk félagsins. Um 850 starfa fyrir Alvotech í höfuðstöðvum félagsins í Vatnsmýri. Þar af eru um 300 starfsmenn með börn í leikskóla og stærstur hluti þeirra er í Reykjavík.

Eftir ítarlega greiningu komst Alvotech að þeirri niðurstöðu að best væri að stofna fleiri leikskóla. Þannig geti félagið bætt aðstöðu starfsmanna með börn á leikskólaaldri. Félagið sér verkefnið eins fyrir sér sem hluta af samfélagslegri ábyrgð og stuðning við nærumhverfið. Fleiri leikskólapláss geti leyst sameiginlegan vanda og létt undir með foreldrum í viðkomandi hverfum.

„Hjá Alvotech sjáum við á hverjum degi hvað skortur á leikskólum er mikið vandamál fyrir starfsfólk okkar. Við vildum finna lausnir á því, en líka aðstoða aðrar fjölskyldur í sömu stöðu, í þeim hverfum þar sem leikskólarnir verða staðsettir. Það er mjög mikilvægt fyrir okkur að styðja við starfsmenn okkar en ekki síður allt nærsamfélagið,“ segir Jóhann G. Jóhannsson, einn af stofnendum Flóka Invest, í tilkynningu.

Halldór Benjamín Þorbergsson forstjóri Heima segir að félag hans sjái nú þegar um rekstur fasteigna fyrir einn grunnskóla og fjóra leikskóla. Heimar séu spenntir að geta nýtt þessa reynslu fyrir starfsfólk Alvotech og börn þeirra.