Skipulagsnefnd Garðabæjar hefur óskað eftir kynningu frá Hafnarfjarðarbæ um fyrirhugaðar framkvæmdir tengdar Coda Terminal, kolefnis niðurdælingarverkefni Carbfix. Framkvæmdin gæti haft áhrif á stöðu og ástand grunnvatns í Garðabæ.
Mikið hefur verið fjallað um Coda Terminal verkefnið í fjölmiðlum. Fyrirhugað er að dæla koldíoxíði niður í jörðina sunnan við Vallahverfið í Hafnarfirði, bæði frá föngunarstöðvum hérlendis og erlendis. Gert er ráð fyrir stækkun Straumsvíkurhafnar til að taka á móti sérútbúnum tankskipum.
Verkefnið hefur verið umdeilt í Hafnarfirði, einkum á meðal íbúa í Vallahverfi sem telja að um risastórt tilraunaverkefni sé að ræða allt of nálægt íbúabyggð. Dæla þurfi upp miklu grunnvatni með ófyrirséðum afleiðingum. Sex þúsund manns mótmæltu framkvæmdinni með undirskriftalista og kröfðust íbúakosningar sem var þó ekki samþykkt í bæjarstjórn.
Nú hefur Hafnarfjörður sent nágrönnum sínum í Garðabæ tillögur að aðalskipulagsbreytingum. Meðal annars fyrir stækkun Straumsvíkurhafnar og uppsetningu borteiga í Kapelluhrauni og Hellnahrauni.
Voru þessar tillögur teknar fyrir á fundi skipulagsráðs Garðabæjar í gær og féllust fulltrúar ekki á að leggja blessun sína yfir þær að óathuguðu máli.
Segir meðal annars að í umhverfismatsskýrslu hafi komið fram að áhrifa muni hugsanlega gæta á stöðu og ástand grunnvatns innan marka Garðabæjar. Meðal annars þurfi að fylgjast með áhrifum á Urriðakotsvatn. Var því ákveðið að óska eftir kynningu Hafnarfjarðarbæjar á þessum tillögum áður en afstaða væri tekin til framkvæmdarinnar.
