Í Lögbirtingablaðinu í dag er birt fyrirkall þar sem maður á þrítugsaldri sem sagður er búsettur á Ítalíu er kvaddur til að mæta fyrir Héraðsdómi Reykjavíkur 27. ágúst næstkomandi en þá verður þingfest sakamál, sem höfðað er með ákæru Lögreglustjórans á höfuðborgarsvæðinu, á hendur honum og öðrum manni sem einnig er á þrítugsaldri en er búsettur hér á landi. Eru mennirnir ákærðir fyrir tilraun til fjársvika með því að hafa sett á svið umferðarslys í Hafnarfirði í apríl 2021.

Í Lögbirtingablaðinu segir að mennirnir hafi sett á svið umferðarslys á gatnamótum Breiðhellu og Gjáhellu í Hafnarfirði, í þeim tilgangi að svíkja út vátryggingabætur á grundvelli kaskótryggingar og lögboðinnar ökutækjatryggingar bifreiðar hjá Vátryggingafélagi Íslands hf. Annars vegar vegna skemmda á umræddri bifreið og hins vegar vegna skemmda á annarri bifreið sem annar mannanna hafi ekið norður Gjáhellu, stöðvað síðan akstur við gatnamót Gjáhellu og Breiðhellu í um það bil 40 sekúndur, þar til hann ók bifreiðinni hægt í veg fyrir hina bifreiðina sem hinn maðurinn hafi ekið norðvestur Breiðhellu, með þeim afleiðingum að árekstur varð með bifreiðunum á gatnamótunum.

Segir enn fremur í Lögbirtingablaðinu að mennirnir hafi undirritað tjónstilkynningu sama dag og annar þeirra sent Vátryggingafélagi Íslands tilkynninguna í tölvupósti samdægurs. Hafi mennirnir þannig með blekkingum reynt að fá félagið til að bæta tjónið en áætlaður kostnaður af yfirtöku annarrar bifreiðarinnar hafi verið 800.000 krónur en 400.000 krónur vegna hinnar bifreiðarinnar sem kom við sögu.

Er þess krafist að mennirnir verði dæmdir til refsingar.