Vakin var athygli á málinu í Facebook-hópi íbúa Norðurbæjar í Hafnarfirði á öðrum tímanum í dag þar sem móðir stúlkunnar lýsti atvikinu. Var stúlkan, sem er 12 ára, á leið í Víðistaðastóla, örlítið of sein, þegar maður kom aftan að henni, tók hana hálstaki og fyrir munn hennar.
„Hún nær að bíta hann, sparkar aftur fyrir sig og nær þá að rífa sig lausa. Þegar hún sparkar virðist hann blóta en ekki á tungumáli sem dóttir mín skilur. Lýsing hennar passar að nokkru leyti við manninn sem varað var við í byrjun maí en þessi var í svartri úlpu með hettu sem huldi að hluta andlit hans en ekki appelsínugulri. Þetta var nálægt sparkvellinum við Víðistaðaskóla en rétt fyrir utan það svæði sem myndavélar skólans ná á,“ sagði móðir stúlkunnar.“
Fjallað var um sambærileg atvik í fréttum fyrir hálfum mánuði en þá hafði lögreglu borist tvær ábendingar um mann sem sagður var hafa áreitt börn nærri Engidalsskóla í Hafnarfirði. Engidalsskóli er skammt frá Víðistaðaskóla og var maðurinn sagður hafa elt einn dreng og ráðist á annan.
Skúli segir í samtali við DV að lögreglu hafi ekki tekist að hafa hendur í hári mannsins og það sé í rannsókn hvort um sama mann sé að ræða í öllum tilvikum. „Þetta er í rannsókn þetta tilvik ásamt hinum. Við tengjum þetta svo sem saman en vitum það ekki fyrir víst. Við erum að vinna í þessu.“
Skúli segir að stúlkan sem varð fyrir manninum í morgun hafi ekki verið með sýnilega áverka en eðli málsins samkvæmt brugðið.
DV ræddi við föður stúlkunnar og vildi hann brýna fyrir foreldrum að ræða við börn sín. „Það var búið að minnast á þessa hættu við hana og það er kannski ein ástæða þess að hún fraus ekki, hún vissi strax að hún var í hættu,“ segir hann.
