Flestir Íslendingar ættu að þekkja til Guðmundar Felix Grétarssonar sem vakið hefur heimsathygli eftir að nýir handleggir, í stað þeirra sem hann missti eftir skelfiegt vinnuslys, voru græddir á hann. Guðmundur Felix hefur boðið sig fram til Forseta Íslands og er enn að safna meðmælum en ljóst er að tíminn er orðinn naumur enda rennur framboðsfrestur út á föstudaginn næstkomandi. Til að hvetja kjósendur til að veita sér mæðmæli ætlaði Guðmundur sér að birta auglýsingu á Facebook með vísan til þeirrar þrautagöngu sem hann hefur gengið. Hann segir hins vegar í færslu á Facebook-síðu sinni fyrr í dag að auglýsingunni hafi verið hafnað á þeim forsendum að hún beindist gegn kosningunum sjálfum.
Guðmundur Felix birtir auglýsinguna sem Facebook hafnaði í færslunni. Einnig birtir hann þau svör sem hann segist hafa fengið frá Facebook um hvers vegna auglýsingunni sé hafnað. Svörin eru á ensku en í þeim er vísað til reglna um hvers konar auglýsingar sé bannað að birta á miðlinum í ríkjum Evrópusambandsins, sem á væntanlega líka við um EES-ríkið Ísland, Ísrael, Indlandi, Mexíkó, Brasilíu og Bandaríkjunum.
Facebook segir að þetta eigi við um auglýsingar þar sem fólk sé ekki hvatt til að kjósa í tilteknum kosningum. Þar á meðal auglýsingar þar sem því sé haldið fram að það sé tilgangslaust að kjósa. Þetta gildi líka um auglýsingar þar sem lögmæti yfirstandandi kosninga eða kosninga sem framundan eru sé dregið í efa. Loks eigi bannið við um auglýsingar þar sem fram komi ótímabærar yfirlýsingar um sigur í tilteknum kosningum.
Eins og áður segir birtir Guðmundur Felix auglýsinguna og þar er lítið minnst á kosningarnar sem slíkar heldur fyrst og fremst hann sjálfan og óskað eftir meðmælum. Auk myndar af Guðmundi Felix sjálfum og nafni hans er eftirfarandi texti í auglýsingunni.
„Gefðu þín meðmæli með trú, áræðni og þrautseigju. Smelltu á „sign up“ til að fara inná Island.is. Lifði af 11.000 volt. Hátt í 100 aðgerðir. Þar af tvenn lifrarskipti. Yfirsteig lyfjaánetjun. 23 ár án handleggja. Fékk nýja handleggi fyrstur manna eftir 14 ára baráttu. Þrjú ár í endurhæfingu. Vantar núna þinn stuðning til að komast í baráttuna um Bessastaði.“
Vandséð virðist hvernig þessi texti brýtur í bága við þær reglur sem vísað er til í svari Facebook til Guðmundar en ólíklegt er að manneskja hafi komið að þeirri ákvörðun að hafna auglýsingunni. Gervigreind, algóritmi eða annað tölvukerfi á vegum Facebook hefur líklega alfarið séð um það. Guðmundur Felix gerir sér fulla grein fyrir þessu og skrifar í færslunni:
„Magnað þegar amerískir róbotar eru farnir að hafa áhrif á lýðræðislegar kosningar í öðrum löndum.“
