Karlmaður með ungt barn hefur ítrekað sést fara inn á lóðir hjá íbúum í Kópavogi og í Hafnarfirði að undanförnu. Eru íbúar skelkaðir að um sé að ræða innbrotsþjóf sem noti barnið sem skálkaskjól fyrir því að vaða inn á lóðirnar. Hefur hann verið kallaður „garðavapparinn.“
Gunnar Hilmarsson, aðalvarðstjóri á lögreglustöðinni við Dalveg í Kópavogi, staðfestir að málið hafi komið inn á borð lögreglu. Maðurinn hafi meðal annars sést á öryggismyndavélum íbúa fara inn á lóðir ásamt barni á þríhjóli.
„Það var talað við þennan mann og teknar niður upplýsingar um hann,“ segir Gunnar en að öðru leyti geti hann ekki tjáð sig hvað kom út úr þeirri yfirheyrslu. Maðurinn hafi ekki verið kærður.
Rætt hefur verið um garðavapparann í hverfagrúbbum í Kópavogi og í Hafnarfirði. Fyrstu tilfellin fyrir um mánuði síðan en þau nýjustu í þessari viku.
Einn íbúi í Hjallahverfi greinir frá því að hún hafi í þrígang staðið erlendan mann með um þriggja ára dreng að því að fara inn í garðinn og leyfa barninu að leika sér þar. Fyrir skemmstu hafi hún séð að hann var kominn upp á pall við húsið á meðan barnið lék sér í garðinum.
Eitt kvöldið þegar hann kom í garðinn með barnið var hringt á lögregluna sem kom og tók hann upp í bíl. Maðurinn hafi sést annars staðar á upptökum vera að leita í görðum og hafi greinilega verið að kannað aðstæður.
Annar íbúi í sama hverfi greindi frá því í mars að ókunnugur maður með barn væri að væflast á milli húsa. Maðurinn héldi á bolta sem hann kastaði langt inn í garðana og lét eins og barnið hefði kastað boltanum. Þetta væri skýrt merki um að maðurinn væri að nota barnið sem afsökun til að fara inn í garða og kanna aðstæður fyrir eitthvað vafasamt athæfi.
Enn annar íbúi í hverfinu greinir frá því að hafa séð manninn bæði inn á planinu hjá sér og hjá nágranna sínum.
Í Suðurbænum í Hafnarfirði greindi íbúi frá því að karlmaður með ungt barn hefði vaðið inn á pallinn við húsið sitt. Náði viðkomandi mynd af manninum sem virtist vera að tala í síma á meðan barnið var að fikta í gasgrillinu.
Lýsa íbúar óhugnaði yfir þessu, benda fólki á að læsa vel hurðum og fylgjast með. Einnig að hafa samband við lögreglu ef vaðið er inn á lóð.
