Jeff Gunter, hinn óvinsæli fyrrverandi sendiherra Bandaríkjanna á Íslandi, fer nú mikinn í sjónvarpsauglýsingum vestra þar sem hann reynir að komast á þing fyrir Repúblíkanaflokkinn. Segist hann vera 110 prósent stuðningsmaður Donald Trump og að hann hafi sigrast á Kínverjum sem sendiherra á Íslandi.
„Ég var sendiherra Trump á Íslandi. Þar barðist ég við djúpríkið, ég barðist við Kína og ég barðist gegn ásælni Rússa á Norðurslóðum,“ segir Gunter í einni auglýsingunni.
Gunter reyndist afar óvinsæll sendiherra og var stuttri tíð hans í sendiráðinu lýst sem „ógnarstjórn.“ Komst hann bæði upp á kant við eigið starfsfólk og Íslendinga. Árið 2021 birti innra eftirlit bandaríska utanríkisráðuneytisins svarta skýrslu um starfsemi sendiráðsins undir hans stjórn.
Hart er barist um tilnefningu Repúblíkanaflokksins til kosninga um öldungardeildarþingsæti í Nevada fylki. Gunter hefur eytt 3,3 milljónum Bandaríkjadollara í auglýsingar, eða tæpum hálfum milljarði króna.
Gunter á undir högg að sækja í baráttunni því að flokkselítan stendur að baki Sam Brown, fyrrverandi hermanni í stríðinu í Afganistan. Sá sem vinnur forvalið verður frambjóðandi flokksins um sæti sem Jacky Rosen, þingmaður Demókrata situr í núna. Fleiri eru í framboði, svo sem Jim Marchant og Tom Grady, sem áður hafa reynt við embætti í fylkinu en tapað í kosningum.
Donald Trump hefur ekki stutt neinn frambjóðanda í forvalinu en þeir keppast um hylli hans. Sérstaklega Gunter sem segist í auglýsingum vera 110 prósent stuðningsmaður Trump og ætli að hjálpa honum að „klára vegginn.“ Á þar við vegg við landamæri Mexíkó sem Trump lofaði árið 2016.
Demókratar fagna því að sjá fram á harkalegan slag Repúblikana í Nevada þar sem frambjóðendur lýsi sífellt öfgafyllri skoðunum. Muni það fjarlægja flokkinn frá hinum venjulega kjósanda í fylkinu sem aðhyllist ekki slíkar skoðanir.
