Ástralskur golfari að nafni Stephen Roche brá heldur betur í brún þegar hjörð af kengúrum kom æðandi inn á völlinn. Kengúrur geta verið stórvarasamar og hafa slasað golfara.
Roche var að golfa á Heritage Golf and Country Club vellinum, norðaustan við borgina Melbourne í Victoriu fylki þegar hann sá ósköpin. Tók hann þetta upp á myndband og birti á samfélagsmiðlinum X.
Lýsti Roche því að kengúrurnar væru að spretta eftir fjórðu holu á St. James vellinum, sem er einn af nokkrum völlum á staðnum.
Annar golfari, sem var á staðnum, lýsti þessari ótrúlegu sjón líka. „Það var eins og þetta væri endalaust,“ sagði hann.
Það er í sjálfu sér ekki óalgengt að kengúrur sjáist á golfvöllum í Ástralíu en að þær sjáist hlaupa yfir vellina tugum saman er langt frá því að vera algengt.
Í athugasemdum við færslu Roche var hann spurður að því hvort völlurinn væri ekki í slæmu ásigkomulagi eftir þessa innrás. En hann sagði svo ekki vera.
„Merkilegt nokk þá nei,“ sagði hann. „Kengúrur eru mjúkfætt dýr. Einu ummerkin eftir þetta eru fótspor í sandgryfjunum.“
Líktu netverjar myndbandinu við atriði úr kvikmyndinni Jurassic Park eða Jumanji. „Komu þær við í golfbúðinni á leiðinni út?“ spurði einn þeirra í háði. „Hljóta að vera meðlimir, snertu ekki hrífuna,“ sagði annar.
Það hefur sýnt sig að kengúrur hafa lítinn áhuga á golfboltum. Þær hafa hins vegar meiri áhuga á grasinu, einkum hávöxnu grasi við jaðra golfvallanna. Sums staðar, eins og á Anglesea Golf Club vellinum sem er einnig í Victoriu fylki, eru þær látnar óáreittar. Þær skíta á vellina en það er þá ókeypis áburður fyrir vallarstarfsmenn.
„Ef það er ungi að koma út úr pokanum og æfa sig í að hoppa, þá geturu ekki annað en hætt að spila og stara á það gapandi, jafn vel þó þú hafir séð það hundrað sinnum áður,“ sagði Marg Lacey, stjórnarmaður hjá Anglesea, í viðtali við bandarísku sjónvarpsstöðina CNN. „Þær eru óendanlega heillandi og golfarar elska þær.“
