Á fundi borgarstjórnar Reykjavíkur í gær var tillögu borgarfulltrúa Sjálfstæðisflokksins um að bjóða út sorphirðu í Reykjavík vísað til borgarráðs. Tillagan kemur í kjölfar margra frétta í fjölmiðlum og frásagna íbúa borgarinnar um að sorphirða hafi gengið seint og illa síðan nýtt flokkunarkerfi var innleitt. Eins og kunnugt er sér borgin sjálf um sorphirðu en í flestum nágrannasveitarfélögunum er hún boðin út.
Í greinargerð með tillögu Sjálfstæðisflokksins segir einmitt að sorphirða í borginni hafi víða verið fleiri vikum á eftir áætlun og losun grenndargáma illa sinnt. Sorphirða sé boðin út í öllum nágrannasveitarfélögum og hafi innleiðing nýja kerfisins gengið töluvert betur á öllu höfuðborgarsvæðinu utan Reykjavíkur. Jafnframt hafi komið í ljós að gjaldskrár sorphirðu séu töluvert hagstæðari fyrir íbúa í nágrannasveitarfélögum heldur en í Reykjavík þar sem sorphirðugjöld séu hæst. Gjald fyrir til að mynda þrjár 240 lítra flokkunartunnur (pappírstunnu, plasttunnu og tvískipta tunnu fyrir blandað og lífrænt sorp) auk gjalds fyrir rekstur grenndar- og endurvinnslustöðva sé samtals 90.500 krónur í Reykjavík, 62.500 krónur í Kópavogi, 68.798 krónur í Hafnarfirði og 72.190 krónur í Garðabæ. Þess vegna sé lagt til sorphirða verði boðin út í Reykjavík til að tryggja borgarbúum betri þjónustu og lægri þjónustugjöld.
Borgarfulltrúar meirihlutaflokkanna, Samfylkingarinnar, Viðreisnar, Framsóknarflokksins og Pírata andmæltu því í sinni bókun að þjónusta við sorphirðu í Reykjavík væri ekki góð. Reykjavík komi afar vel út í samanburði við önnur sveitarfélög á höfuðborgarsvæðinu þegar komi að verði og gæðum þjónustu. Flokkarnir samþykktu að vísa tillögu sjálfstæðismanna til borgarráðs í ljósi þess að ávallt þurfi að hafa vakandi auga fyrir bættum rekstri og bættri þjónustu.
Flokkur fólksins samþykkti einnig að vísa tillögunni til borgarráðs og í bókun flokksins er tekið undir að vert sé að kanna útboð á sorphirðu ekki síst vegna hærri gjaldskrár í Reykjavík en Kópavogi sem býður út sorphirðu.
Borgarfulltrúar Vinstri grænna og Sósíalistaflokksins höfnuðu því hins vegar að vísa tillögu Sjálfstæðismanna til borgarráðs og lýsa sig mótfallin útboði á sorphirðu borgarinnar.
Í bókun borgarfulltrúa Sósíalista á fundinum segir meðal annars:
„Ef nokkur sparnaður fæst af slíkri útvistun er hann fenginn úr launaumslagi verkafólks, verri þjónustu, eða hvoru tveggja.“
Borgarfulltrúi Vinstri grænna var ekki mikið hrifnari af hugmyndunum. Í bókun flokksins segir meðal annars að einkavæðing sorphirðunnar sé ekki töfralausn sem bæti þjónustustig og lækki um leið gjöldin. Reykjavíkurborg eigi áfram að þjónusta heimili, stofnanir og fyrirtæki í borginni. Hins vegar megi hugsa sér að í náinni framtíð gæti höfuðborgarsvæðið sameinast um að færa alla sorphirðu til Sorpu bs.
