Breska ríkisútvarpið BBC greinir frá því að borgarstjórn Birmingham, næst fjölmennustu borgar Bretlands, hafi í samræmi við ákvæði breskra laga um fjárreiður sveitarfélaga lagt fram formlega tilkynningu um að hún hafi fryst öll útgjöld nema þau sem eru bráðnauðsynleg til að standa vörð um lögbundna grunnþjónustu borgarinnar.
Þessi þróun er sögð eiga einkum rætur sínar að rekja til 760 milljóna punda reiknings (um 127,1 milljarður íslenskra króna) sem féll á borgina. Þessi upphæð samsvarar öllum útgjöldum vegna þjónustu borgarinnar á einu ári. Reikningurinn féll á borgina eftir að hún tapaði dómsmáli sem fjöldi kvenkyns starfsmanna hennar höfðaði vegna ójafnfræðis í launum gagnvart karlkyns starfsmönnum.
Tilkynning af þessu tagi er ekki lögð fram nema borgar- eða sveitarstjórn í Bretlandi telji sig vera í fjárhagslegri nauð og hafi ekki lengur stjórn á fjármálum viðkomandi sveitarfélags.
Þetta er ekki í fyrsta sinn sem breskt sveitarfélag leggur slíka tilkynningu fram en Birmingham er það stærsta sem það hefur gert.
Meirihluti borgarstjórnar Birmingham, sem skipaður er liðsmönnum Verkamannaflokksins, segir tilkynninguna vera nauðsynlega til að ná aftur stjórn á fjármálum borgarinnar.
Leiðtogi minnihlutans í borgarstjórn, sem tilheyrir Íhaldsflokknum, segir að meirihlutinn hafi ekki tekið á afleiðingum dómsmálsins af nægilega mikilli festu.
Leiðtogar meirihlutans segja að gallar í nýju tölvukerfi borgarinnar hafi einnig sett talsverðan þrýsting á fjárhag hennar. Þeir segja að sömuleiðis hafi aukin eftirspurn eftir félagslegri þjónustu og minnkandi skatttekjur af atvinnurekstri, vegna verðbólgu, gert illt verra. Auknar hömlur hafi verið sett á útgjöld í júlí síðastliðnum. Leitað hafi verið aðstoðar og ráðgjafar hjá Sambandi breskra sveitarfélaga.
Þrátt fyrir þessa erfiðleika segja leiðtogar meirihlutans að grunnþjónusta verði sett í algjöran forgang sem sé í samræmi við þeirra gildi um að styðja þá íbúa borgarinnar sem höllustum fæti standa.
Áðurnefndur reikningur er sagður hækka um 5-14 milljónir punda í hverjum mánuði (á bilinu 836 milljónir til 2,3 milljarðar íslenskra króna).
Samkvæmt dómi ber borgarstjórninni að greiða hann en samkvæmt áðurnefndri tilkynningu ræður borgin einfaldlega ekki við að greiða reikninginn.
Samkvæmt þessu getur Birminghamborg ekki staðið við skuldbindingar sínar og er því komin í greiðslufall sem þýðir að borgin er tæknilega gjaldþrota. Sveitarfélög í Bretlandi geta lagalega séð ekki orðið gjaldþrota en þegar tilkynning af þessu tagi er lögð fram er því oft lýst þannig að viðkomandi sveitarfélag sé í raun gjaldþrota
Leiðtogar meirihlutans segja að unnið sé að lausnum á stöðunni og að tilkynnt verði um næstu aðgerðir þegar þær liggja fyrir. Reiknað er með því að borgarstjórn Birmingham muni þurfa að samþykkja nýja fjárhagsáætlun sem felur í sér verulegan niðurskurð.
