Bandaríkjamenn eru í viðbragðstöðu eftir að ógnarstór kínverskur loftbelgur, sem sagður er útbúinn til njósna, sást í 60 þúsund feta hæð í bandarískri lofthelgi í vikunni. Loftbelgurinn, sem er mannlaus, svífur í austurátt og mun fara yfir fjölmörg viðkvæm svæði í Bandaríkjunum sem hefur valdið talsverðum titringi ytra og meðal annars hefur utanríkisráðherra þjóðarinnar hætt við opinbera heimsókn til Kína vegna málsins. Kínverjar hafna njósnum og segja að um rannsóknarloftbelg sé að ræða sem hafi fokið yfir Bandaríkin fyrir slysni. Þá hefur verið greint frá því að annar slíkur loftbelgur hafi sést fyrir ofan Suður-Ameríku.
Í umfjöllun CNN kemur fram að Joe Biden, Bandaríkjaforseti, hafi verið upplýstur um tilvist njósnabelgsins síðastliðinn þriðjudag og fengið ítarlegar uppfærslur á stöðunni síðan. Bandarísk yfirvöld hafi þegar í stað gripið til aðgerða til þess að takmarka þær upplýsingar sem að loftbelgurinn gæti mögulega safnað í ferð sinni.
Bandaríkjamenn hafa gefið það út að enn sem komið er stafi ekki pólitísk né hernaðarleg ógn af loftbelgnum en fylgst er vel með för hans. Þá hefur komið til tals að skjóta belginn niður en það gæti skapað hættu á mannfalli eða annarskonar tjóni byggingum og innviðum. Til marks um stærð belgsins er að undir honum er mannvirki sem er á stærð við þrjá strætisvagna.
Eins og áður segir var að Anthony Blinken, utanríkisráðherra Bandaríkjanna, myndi halda í opinbera heimsókn til Kína í vikunni en hætt var við þá heimsókn útaf njósnabelgnum. Er haft eftir Blinken að engin grundvöllur væri fyrir viðræðunum sem áætlaðar voru vegna belgsins og að um væri að ræða grófa atlögu að fullveldi Bandaríkjanna.
„Við erum fullviss um að loftbelgurinn sé útbúinn til njósna,“ sagði Blinken á blaðamannafundi í gær.
Kínversk yfirvöld vísa því alfarið á bug að um njósnabelg sé að ræða. CNN hefur eftir talsmanni yfirvalda að belgurinn sé eigu einkafyrirtækis og sé útbúinn til rannsókna á lofthjúpi jarðar. Óviðráðanlegar ástæður hafi orðið til þess að loftbelgurinn fauk stjórnlaust af leið og inn í lofthelgi Bandaríkjanna.
