Björgunarsveitir á Suðurnesjum voru kallaðar út fyrir um hálftíma síðan til að leita að tveimur göngumönnum nálægt fyrri gosstöðvum á Reykjanesskaga. Þyrla Landhelgisgæslunnar hefur einnig verið ræst út.
VF sögðu fyrst frá á Facebook síðu sinni.
„Flugmaður lítillar einkaflugvélar, sem var að fljúga þarna yfir, tók eftir ljósmerki frá jörðu sem var hægt að lesa sem S.O.S. merki frá vasaljósi,“ segir Jón Þór Víglundsson, upplýsingafulltrúi Landsbjargar.
Talið er að göngumennirnir séu tveir en ekki er vitað neitt um þá. Til dæmis ekki hvort þetta séu Íslendingar eða útlendingar.
Merkjasendingarnar komu ekki frá núverandi gosstöðvum heldur fyrri, ekki langt frá Litla Hrút. Hugsanlegt er að þeir hafi verið á leiðinni að nýju gosstöðvunum. „Hvort að viðkomandi hafi verið á leiðinni þangað er ómögulegt að segja,“ segir Jón Þór.
Leit er nú rétt að hefjast. „Fólk er að tínast á staðinn. Það er líka búið að kalla úr þyrlu Gæslunnar,“ segir Jón Þór.
Uppfært:
Göngumaðurinn reyndist vera einn. Hann var kaldur og hrakinn og fannst á milli Keilis og Kistufells.
Lögreglan á Suðurnesjum ítrekar fyrir fólki að ana ekki af stað að gosinu. Aðstæður eru mjög erfiðar og vegalengdin löng.
