Eurovision sigurvegarinn Susana Jamaladinova, betur þekkt sem Jamala, er komin á lista Rússa yfir eftirlýsta glæpamenn. Er hún sökuð um að gera lítið úr mætti rússneska hersins.
Tass og fleiri rússneskir ríkismiðlar greina frá þessu.
Jamala, sem er fertug að aldri, er Tatari frá Krímskaga og Úkraínumaður. En Rússar hernumdu svæðið árið 2014 og þykjast hafa innlimað það. Langflest ríki heims viðurkenna ekki innlimunina.
Söngkonan kom, sá og sigraði Eurovision keppnina árið 2016 í Stokkhólmi í Svíþjóð með laginu „1944“ fyrir Úkraínu. Lagið fjallar um þjóðernishreinsanir Sovétmanna á krímverskum Töturum þetta téða ár. En margir þeirra voru fluttir nauðugir til Mið-Asíu, þar á meðal ættingjar Jamölu.
Jamala fékk flest stig í keppninni, 534 talsins, þar af 323 frá almenningi.
Innanríkisráðuneyti Rússlands hefur nú ákært Jamölu fyrir að gera lítið úr mætti rússneska hersins. Í nóvember gaf rússneskur dómstóll út handtökuskipun á hana þrátt fyrir að hún sé ekki rússneskur ríkisborgari.
Jamala hefur stutt dyggilega á bak við málstað heimalands síns. Meðal annars hefur hún ferðast um heiminn og safnað fé fyrir varnir landsins gegn innrás Rússa.
