Mörður Áslaugarson fulltrúi Pírata í stjórn Ríkisútvarpsins ohf. (RÚV) kvartar yfir málsmeðferð stjórnarinnar í færslu á Facebook-síðu sinni fyrr í kvöld. Áköll hafa heyrst um að RÚV dragi sig úr Söngvakeppni evrópskra sjónvarpsstöða (Eurovision) ef Ísrael verður leyft að taka þátt í keppninni. Mörður segist hafa lagt tillögu þessa efnis fyrir fund stjórnarinnar en því hafi verið hafnað að greiða atkvæði um tillöguna.
Færsla Marðar hljóðar svo:
„Ég er í stjórn RÚV. Ég hef aldrei áður tjáð mig opinberlega um setu mína þar. Í dag get ég ekki orða bundist og er sleginn.
Á fundi stjórnar lagði ég fram eftirfarandi tillögu að ályktun vegna Eurovisoin:
„Stjórn RÚV ályktar að ekki verði tekið þátt í Erovision 2024 ef Ísrael tekur þátt í keppninni. „
.Fundurinn hafnaði því að taka þessa tillögu til atkvæða. Aðeins Margrét Tryggvadóttir studdi hana.“
Silja Dögg Gunnarsdóttir er formaður stjórnar RÚV, sem í sitja níu manns sem eru tilnefndir af Alþingi og einn maður sem tilnefndur er af samtökum starfsmanna RÚV. Aðrir stjórnarmenn, auk Marðar og Margrétar Tryggvadóttur eru:
Rósa Kristinsdóttir, Marta Guðrún Jóhannesdóttir, Ingvar Smári Birgisson, Aron Ólafsson, Þráinn Óskarsson, Diljá Ámundadóttir Zoega og Hrafnhildur Halldórsdóttir.
Vísir greindi fyrst frá málinu en þar kemur fram að enginn stjórnarmanna hafi viljað tjá sig um málið og ekki verði veittar upplýsingar um það sem fram fór á fundinum fyrr en fundargerð verður birt.
