Ágúst Ásgrímsson bóndi lýsir neyðarástandi hjá kúabændum í landinu. Í grein sem hann birtir á Vísir.is segir hann:
„Ég hef engin vopn í hendi mér til bjargar í mjólkurframleiðslunni frekar en aðrir bændur sem fóru í tilneyddar fjárfestingar vegna Evrópureglugerða sem þvinguðu bændur, annað hvort að stefna á að hætta mjólkurframleiðslu eða byggja nýtt fjós. Mat ég það þannig, það að bera titilinn Gústi bóndi væri 250 milljóna króna skulda virði.“
Hann segir sig og eiginkonu sína hafa unnið nær kauplaust síðustu misseri eftir þær fjárfestingar í búnaði sem Evrópureglugerðir kröfðust, en þau vinni að meðaltali, hvort um sig, um 12 stundir á dag:
„Við erum orðnir þrælar, hlekkjaðir við aðstæðurnar. Einhverjir verða að mjólka en maður spyr sig! hvenær fær maður nóg??? Á maður bara að hætta, selja eignir, borga skuldir og búa á jörðinni skuldlausri með tærnar upp í loft og horfa á sólina setjast.“
Hann segir fjárfestingu í kúabúi krefjast mikils fjármagns og því sé engin nýliðun í greininni, meðalaldur bænda nálgist 60 ár. Ágúst lýsir stöðunni í prósentutölum sem draga upp dökka mynd:
„Helstu aðföng til mjólkurframleiðslu hafa hækkað gríðarlega á síðustu árum. Áburður hefur hækkað um 140% . fóðurblanda um 40% og olía um 70%. Á sama tíma hefur verðlagsnefnd búvara hækkað mjólkurverð til bænda um ca. 25% frá 1. júní 2020. 2004 voru niðurgreiðslur á búvörum 45%, árið 2023 eru þær 20%. Þetta reikningsdæmi er hætt að ganga upp. Kostnaður eykst og niðurgreiðslur frá ríki hafa stórlega lækkað.“
Ágúst segir að skrif sín séu ákall um hjálp og segir að lokum þetta:
„Kúabændum er að fækka, ljósin eru að slökkna í fjósunum og verða ekki kveikt aftur.“