Í dag fara fram tveir leikir í Subwaydeild karla og kvenna í körfubolta í Smáranum í Kópavogi. Klukkan 14.00 leikur Grindavík á móti Þór í kvennaboltanum og klukkan 17.00 leikur Grindavík á móti Hamar í karlaboltanum.
Á samfélagsmiðlum má sjá að Grindvíkingar hyggjast fjölmenna í Smárann að styðja sitt fólk og hitta vini og kunningja, en grindvískt samfélag hefur nú verið tvístrað í eina viku.
Fyrir leik er boðið upp á fisk og franskar að hætti Issa, Jóhanns Hallgrímssonar, sem er Grindvíkingur og fiskurinn er að sjálfsögðu frá Grindavík. Það eru hjálparsamtökin World Central Kitchen sem bjóða Grindvíkingum og gestum leikanna upp á ókeypis fisk og franskar í Smáranum í dag. Matarvagninn ISSI – Fish and Chips verður staðsettur fyrir utan Smárann frá klukkan 13.
„World Central Kitchen höfðu samband við okkur hjá Grindavík og vildu hjálpa okkur Grindvíkingum. Samtökin vinna á alþjóðavísu og veita mataraðstoð þar sem náttúruhamfarir eiga sér stað,“ segir í færslu Jóns Júlíusar Karlssonar, framkvæmdastjóra Ungmennafélags Grindavíkur, í Facebookhópnum Aðstoð við Grindvíkinga. „Við hvetjum því alla Grindvíkinga til að fjölmenna og fá endurgjaldslaust að þiggja Fish & Chips. Fiskurinn er af sjálfsögðu frá Grindavík!.“
Jón þakkar World Central Kitchen og Blikum fyrir gestrisni sína og væntumþykju. „Áfram Grindavík!“
