Fjöldi Grindvíkinga er nú á leið til Grindavíkur þar sem Lögreglustjórinn á Suðurnesjum tók ákvörðun um að hleypa íbúum inn á skilgreint svæði í bænum til að sækja eigur af heimilum sínum. Síðar barst önnur tilkynning þar sem fleiri íbúum var gefin heimild ti að fara inn í bæinn. 

Sjá einnig: Uppfært Fleiri íbúar komast heim – Hluti Grindvíkinga fær að fara heim og sækja eigur sínar

Björgunarsveitin Þorbjörn sem starfar í Grindavík segir í færslu á Facebook að hópur á þeirra vegum hafi farið í bæinn í morgun til að meta tjón og undirbúa verðmætabjörgun. Segir þar að ljóst sé að gríðarlegt tjón er á bænum og verði íbúar að undirbúa sig undir það. Biður sveitin alla um að fara varlega, virða lokanir og virða þann tíma sem þeim er gefinn.

„Kæru íbúar,

Við björgunarsveitarfólk í Grindavík höfum sinnt okkar fjölskyldum eins og aðrir Grindvíkingar síðustu daga.

Snemma í morgun fór stór og vel útbúinn hópur frá okkur til Grindavíkur til þess að meta tjón á vegum og öðrum innviðum. Markmiðið er að undirbúa verðmætabjörgun frá heimilum og reyna eftir fremsta megni tryggja öryggi íbúa við það.

Ljóst er að gríðarlegt tjón er á bænum okkar og gott að fólk undirbúi sig undir það.

Tjónin eru samt misjöfn og virðast staðbundin við fyrstu skoðun. Vegir eru víða í sundur og höfum við lagt kapp á það að loka þeim svo ekki sé hætta af.

Við viljum biðja alla sem hingað koma að fara varlega og virða þær lokanir sem við höfum sett upp. Til þess að flýta fyrir opnun höfum við notast við garðbekki, blómapotta og fleira slíkt sem fundum og vonumst við til þess að fólk sýni því skilning. Við höfum einnig farið með vinnuvélar yfir allar sprungur og þær sprungur sem ekki er búið að loka fyrir teljum við óhætt að aka yfir.

Að lokum viljum við biðja íbúa að virða þann tíma sem þeim er gefin til að sækja verðmæti svo fleiri geti komist til síns heima.

Það væri gott ef þessi póstur myndi rata til allra Grindvíkinga.

Baráttukveðjur

Björgunarsveitin Þorbjörn.“