Fréttir DV í vikunni um mjög sérstætt skattamál sem varðar samskipti þriggja íslenskra kvenna við erlendan auðkýfing hafa vakið mikla athygli.
Héraðssaksóknari hefur ákært þrjár konur fyrir að hafa ekki gert grein fyrir háum fjárgreiðslum frá manninum sem skattskyldum gjöfum. Samtals hafa konurnar þrjár þegið af manninum um 200 milljónir króna á nokkurra ára tímabil.
Sú kona sem fengið hefur mest frá honum, rúmlega 130 milljónir, segir að um lán hafi verið að ræða. Ennfremur hefur hún upplýst að allar skattkröfur vegna málsins hafi verið greiddar. Því sé ákæra Héraðssaksóknara óskiljanleg.
Hinar tvær konurnar eru mæðgur. Sú eldri er á sjötugsaldri en sú yngri á fertugsaldri. Í lok árs 2020 birti dóttirin langa Facebook-færslu sem nú hefur verið eytt, þar sem hún fer hörðum orðum um konuna sem þáði yfir 130 milljónir króna frá manninum.
Þar lýsir hún því yfir að móðir hennar og maðurinn hafi verið vinir frá því um 1990. Þessi gamli vinur móður hennar hafi árið 2015 lýst yfir vilja til að hjálpa henni (þ.e. dótturinni) fjárhagslega, en þá hafi hún átt í basli.
Allar konurnar þrjár hafi síðan farið saman í ferð til Bahama-eyja til að hitta manninn. Þá hafi sú yngsta, sú sem sögð er hafa þegið hæstu fjárhæðina, verið 19 ára gömul. Konan sem skrifar færsluna sakar þá yngstu um að hafa komið sér í mjúkinn hjá manninum, „fokkað í hausnum á honum“ og þannig fengið hann til að gefa sér stórfé. Hún hafi í leiðinni eyðilagt samskipti mæðgnanna við manninn.
„Ég ætla að byggja mig upp frá núlli og er þakklát fyrir að eiga ekki lengur svona ljótt fólk í kringum mig sem lýgur um sig til að fegra sjálfa sig, en sannleikurinn kemur alltaf upp á yfirborðið,“ skrifar konan ennfremur um þessa fyrirverandi vinkonu sína.
Ljóst er því að fullkomin vinslit urðu milli kvennanna á sínum tíma eftir samskipti þeirra við auðkýfinginn. Hins vegar herma heimildir DV að þær séu allar mjög ósáttar við ákæruvaldið vegna ákærunnar í málinu, sem þær telja tilhæfulausa, ekki síst vegna þess að allar kröfur skattayfirvalda í málinu hafi verið greiddar upp. Samkvæmt öruggum heimildum DV eru það réttar upplýsingar.
