Flugfélagið Play hefur tilkynnt um seinkanir á flugferðum vegna óveðursins sem gengur yfir í kvöld og á morgun.

Spáð er suðaustan átt á Keflavíkurflugvelli þar sem búist er við vindhviðum allt að 60 hnútum. En hviðurnar mega ekki fara yfir 50 hnúta svo að hægt sé að koma farþegum örugglega um borð og frá borði.

“Eftir samtal við veðurfræðinga og sérfræðinga, og með öryggi farþega í fyrirrúmi, hefur verið tekin ákvörðun um að ýmist fresta eða aflýsa áætlunarferðum í kvöld og á morgun,” segir í tilkynningu félagsins.

Búið er að fresta ferðum frá Barcelona og Madríd til Keflavíkur í kvöld. Áætluð brottför verður klukkan 11 í fyrramálið og koma til Keflavíkur um klukkan 16.

Play hefur einnig aflýst sjö ferðum til Evrópu í fyrramálið og seinkað flugi til Tenerife og Kaupmannahafnar síðdegis á morgun.

„Áætlunarferðum sem áttu að koma frá Norður Ameríku til Íslands í fyrramálið, 19. október, hefur verið seinkað og mun þess í stað lenda á Keflavíkurflugvelli um klukkan 16 á morgun.”