Menningar- og viðskiptaráðuneytið auglýsir í dag að opnað hafi verið fyrir umsóknir til listamannalauna. Tilgangur þeirra er sagður að efla listsköpun í landinu.
Í samræmi við ákvæði laga um listamannalaun eru til úthlutunar 1600 mánaðarlaun og 133,3 árslaun. Skipting milli listgreina er eftirfarandi:
555 mánaðarlaun úr launasjóði rithöfunda, 46 árslaun
435 mánaðarlaun úr launasjóði myndlistarmanna, 36,3 árslaun
190 mánaðarlaun úr launasjóði sviðslistafólks, 15,8 árslaun
190 mánaðarlaun úr launasjóði tónskálda, 15,8 árslaun
180 mánaðarlaun úr launasjóði tónlistarflytjenda, 15 árslaun
50 mánuðir úr launasjóði hönnuða, 4,2 árslaun
Óskað er eftir því að í umsóknum komi fram lýsing á vinnu og listrænu gildi verkefna, ferill umsækjenda og verk- og tímaáætlun.
Það kemur ekki fram í auglýsingunni hvers vegna mestur fjöldi mánaðar- og árslauna er í boði fyrir rithöfunda. Skiptingin milli listgreina er í samræmi við ákvæði laganna en það kemur heldur ekki fram í þeim hvers vegna rithöfundum er úthlutað mest af launum. Í greinargerð með frumvarpi til laganna, sem tóku gildi árið 2009, er einnig ekki tekið fram hvers vegna skiptingin milli listgreina er eins og hún er þegar kemur að úthlutun launa.
Mögulegra skýringa er hugsanlega að leita í því að af starfandi listamönnum sé fjöldinn mestur meðal rithöfunda en það er þó líklega erfitt að skera úr um það.
Bókmenntir hafa lengst af skipað ákveðinn heiðurssess í íslenskri menningarsögu og sú staðreynd að hæst hlutfall listamannalauna renni til rithöfunda virðist ýta frekari stoðum undir það. Þar er þó um nokkurt matsatriði að ræða.
Umsóknarfrestur er til klukkan 15:00 2. október 2023.
