Egill Helgason fjölmiðlamaður segist viðurkenna það að nýtt sorpflokkunarkerfi geri hann ringlaðan (og líklega er hann langt frá því að vera einn um það“

„Ég verð að viðurkenna að sorpflokkunarkerfið nýja gerir mig nokkuð ringlaðan. Held það eigi við um fleiri. (Konan mín er í meyjarmerkinu og á auðveldara með flokkun! sic!) Hvar á líka að koma fyrir öllum þessum tunnum?“ segir Egill í færslu á Facebook. 

Með lögum um hringrásarhagkerfi sem tóku gildi í janúar 2023 er það orðið að skyldu að flokka heimilisúrgang í fjóra flokka við heimili. pappír og pappi, plastumbúðir, matarleifar og blandaður úrgangur. Slíkt þýðir þó ekki endilega að tunnurnar verði fjórar við hvert og eitt heimili. Eins og segir á vef Reykjavíkurborgar (þar sem Egill býr) er meginmarkmiðið að fjölga tunnum hjá íbúum eins lítið og hægt er. Sama á við annars staðar á landinu. 

„Ég fór í Sorpu um daginn með hjartað í buxunum, óttaðist að vera gerður afturreka með rangt flokkað rusl,“ segir Egill, sem segir vandann þó ekki vera endurvinnslan.

„En vandinn er auðvitað þetta geðveika umbúðasamfélag sem við lifum í. Það snýr auðvitað að framleiðendum og seljendum – hlutum er sífellt troðið í stærri, flóknari og meira áberandi umbúðir. Manni er nánast farið að líða eins og einhvers konar fórnarlambi þessa umbúðasukks. Maður þarf ekki svona miklar umbúðir, langar ekki í þær, það er fátt leiðinlegra en að henda öllu þessu rusli. Segi ég og tek utan af súkkulaði sem hingað kom í þreföldum plastumbúðum. Nýbúinn að taka utan af tölvu sem kom í svo fínum umbúðum að þær gætu verið stofustáss,“ segir Egill. 

Var minna um umbúðir í gamla daga?

Horfir hann til fyrri tíma þar sem umbúðir voru ekki jafn gígantískar og við þekkjum í dag. 

„Ókei, ég ólst upp í samfélagi þar sem varla voru til plastpokar, þar sem skyr var skammtað í bréf, mjólk var enn flöskum og fiskur var pakkaður inn í dagblpöð. Það má sjálfsagt eitthvað á milli vera. En meðan þetta er eins og það er í dag, finnst manni eins og engum sé raunverulega alvara með þessari flokkun, eins og þetta sé tóm sýndarmennska. Á skal að ósi stemma,“ segir Egill og spyr hvort ekki þurfi að þrýsta á framleiðendur og seljendur að taka sig á hvað umbúðir varðar.

Ljóst er að flestir hafa skoðun á sorpi, flokkun þess og endurvinnslu og þegar þetta er skrifað hafa 113 athugasemdir verið skrifaðar við færslu Egils.