Jótlandspósturinn hefur eftir Thorsten Peter, sölustjóra FFG, að fulltrúar danskra stjórnvalda hafi rætt við fyrirtækið um hugsanleg kaup á Leopard-skriðdrekum sem væri hægt að senda til Úkraínu.
FFG á 99 Leopard 1 A5 skriðdreka á lager og eru þeir til sölu. Fyrirtækið keypti þá af Dönum fyrir margt löngu.
Peter sagði að ekki séu neinar beinar áætlanir um að selja Dönum skriðdrekana, danskir embættismenn hafi bara spurt hvaða möguleikar séu í stöðunni. Hann vildi ekki skýra frá hvaða embættismenn væri um að ræða.
Hann sagði að skriðdrekarnir væru í misjöfnu ástandi eftir að hafa staðið óhreyfðir í rúman áratug. Hann sagði að fyrirtækið geti þó gert um 20 skriðdreka bardagafæra á innan við þremur mánuðum.
„Ef þeir eiga að fara í stríð í Úkraínu, þá er tvennt sem þeir þurfa að geta gert. Keyrt og skotið. Við getum náð því á skömmum stíma. Þá getur alveg verið að það sé pera sem virkar ekki eða eitthvað annað sem er ekki mjög mikilvægt,“ sagði hann.
Umræða um hvort Danir muni láta Úkraínu skriðdreka í té blossaði upp á nýjan leik eftir að leiðtogar stjórnarflokkanna þriggja fóru í leynilega skyndiheimsókn til Úkraínu á mánudaginn. Þá þakkaði Volodymyr Zelenskyy, forseti Úkraínu, Dönum fyrir stuðninginn í stríðinu gegn rússneska innrásarhernum en Danir hafa meðal annars sent Úkraínumönnum liðsflutningabíla og Caesar –fallbyssur. En það sem vakti mesta athygli fréttamanna var að hann þakkaði Dönum fyrir „vilja þeirra til að ganga til liðs við skriðdrekabandalagið“.
Með þessum orðum gaf hann í skyn að Danir séu hugsanlega að fara að senda skriðdreka til Úkraínu. Danska ríkisstjórnin vísaði þessu strax á bug og sagði að engar fyrirætlanir væru uppi núna um að gera það.
Danski herinn á 44 Leopard 2 skriðdreka en áður en þeir voru keyptir notaði hann Leopard 1 skriðdreka og átti um 230 slíka.
Danska varnarmálaráðuneytið vildi ekki svara spurningum Jótlandspóstsins um hvor til standi að kaupa skriðdreka af FFG til að senda til Úkraínu.
