Kona ein, eigandi fasteignar í Hjallahverfi, hefur verið dæmd til að klippa trjágróður á lóð sinni þannig að hann skyggi ekki jafnmikið og verið hefur á útsýni nærliggjandi húsa. Eigendur tveggja parhúsa í næstu götu stefndu konunni fyrir Héraðsdóm Reykjaness sem kvað upp dóm í málinu þann 4. janúar. Hins vegar var vísað frá kröfu um að klippa og fjarlægja trjágróður sem vaxið hafa yfir lóðamörk nágrannanna.
Stefnendur í málinu byggðu kröfur sínar á því að þau „eigi lögvarinn rétt til þess að nýta fasteignir sínar með eðlilegum hætti til útiveru og annarra athafna, en það geti þau ekki að óbreyttu ástandi. Stefnendur vísa til þess að umræddur trjágróður skerði nýtingarmöguleika fasteigna þeirra með svo veigamiklum hætti að það fari gegn almennum reglum nábýlisréttar. Samkvæmt almennum ólögfestum reglum nábýlisréttar beri stefndu að taka tillit til nágranna sinna og ráðast í aðgerðir til þess að koma í veg fyrir tjón eða óþægindi nágranna. Óþægindi af trjágróðri á lóð stefndu séu veruleg og viðvarandi og mun meiri en stefnendur þurfi að þola. Íbúar í þéttbýli megi almennt búast við því að fá notið sólar, birtu, útsýnis og annarra réttinda sem fasteignum þeirra fylgi án verulegrar skerðingar. Staðan sé hins vegar sú að hæð og staðsetning trjágróðurs á lóð stefndu geri það að verkum að nær algjörlega skyggi fyrir dagsbirtu og sól á verönd á lóðum stefnenda, frá hádegi yfir sumarið og svo stuttu síðar af svölum á annarri hæð hússins,“ eins og segir í texta dómsins.
Konunni er gert skylt að klippa trén innan þriggja mánaða frá dómsuppsögn en ella greiða dagsektir að fjárhæð 35.000 krónur til stefnendanna. Einnig þarf hún að greiða þeim tæplega 1,7 milljónir króna í málskostnað.
