Áður en Vladímír Pútín, Rússlandsforseti, skipaði rússneska hernum að ráðast inn í Úkraínu hafði hann margoft sagt að ein af aðalástæðunum fyrir óánægju hans með nágranna sína væri að þeir vildu verða meðlimir í NATO. Að Rússar vildu ekki fá bandalagið nær landamærum sínum.

Reuters segir að samkvæmt upplýsingum frá þremur ónafngreindum heimildarmönnum, sem eru sagðir standa nærri rússneskum ráðamönnum, þá hafi samningur við Úkraínumenn verið kynntur fyrir Pútín skömmu fyrir innrásina. Samkvæmt samningnum skuldbundu Úkraínumenn sig til að sækja ekki um aðild að NATO.

Hefur Reuters eftir heimildarmönnunum að Pútín hafi hafnað samningnum og fyrirskipað innrás.

Dmitry Peskov, talsmaður Pútíns, vísaði þessu á bug þegar Reuters bar þetta undir hann.