Borgaryfirvöld í Hanover í Þýskalandi hafa ákveðið að grípa til sparnaðaraðgerða vegna gasskorts. Meðal þess sem verður gert er að hætt verður lýsa byggingar í eigu borgarinnar upp að næturlagi og skrúfað verður fyrir gosbrunna. Skrúfað verður fyrir heitt vatn í opinberum byggingum, sundlaugum og íþróttahúsum.

Sky News segir að Belit Onay, borgarstjóri, hafi skrifað á Twitter að markmiðið með þessu sé að draga úr orkunotkun um 15%. „Þetta eru viðbrögð við yfirvofandi gasskorti sem hefur miklar áskoranir í för með sér fyrir sveitarfélögin, sérstaklega fyrir stórborg eins og Hanover,“ skrifaði borgarstjórinn einnig.

Meðal annarra aðgerða sem gripið verður til er:

Sá tími sem opinberar byggingar eru kyntar á tímabilinu frá október til mars verður styttur nema á leikskólum.

Hámarkshiti í íþróttahúsum verður 15 gráður og 20 gráður í öðrum opinberum byggingum.

LED perur verða settar í öll ljós.

Hreyfiskynjarar verða settir upp á salernum, hjólageymslum, bílastæðum og anddyrum í stað sífelldrar lýsingar.

Bannað verður að nota viftur  og ofna.

Borgarstarfsmenn eru einnig hvattir til að draga úr notkun raftækja á borð við prentara og ísskápa.

Gripið hefur verið til svipaðra aðgerða í München, Leipzig, Köln og Nuremburg.