Nágranni manns sem nú er í haldi lögreglu, grunaður um að hafa orðið manni á fimmtugsaldri að bana á laugardagskvöldið, segir að hinn grunaði hafi lengi sýnt af sér sérkennilega og stundum ógnandi hegðun. Hann segir hann meðal annars hafa verið til umræðu í íbúahópi fyrir hverfið á Facebook fyrir nokkrum árum vegna þess að hafa stundað að sparka í hunda.
„Hann er líka stór og sver og það gerir hann meira ógnvekjandi,“ segir maðurinn í viðtali við DV. Hinn grunaði er fæddur árið 2001 og býr ásamt móður sinni í risíbúð í húsi við Barðavog þar sem hinn hörmulegi atburður átti sér stað. Hinn látni er talinn vera nágranni mannsins en ekki hefur fengist staðfest að hann búi í sama húsi.
„Þessi strákur hefur verið dálítil plága í hverfinu, sérstaklega fyrir nokkrum árum en ég myndi segja að hann hafi ekki verið til mikilla vandræða undanfarið. Mamma hans ræður ekki við hann og hann ætti fyrir löngu að vera kominn í eitthvert úrræði. Þetta er áfellisdómur yfir heilbrigðiskerfinu.“
Aðspurður hvort nágrannar séu slegnir óhug segir maðurinn svo vissulega vera en bætir við: „Þetta er hræðilegt en maður hefur verið að bíða eftir þessu.“
Lögregla var kölluð til tvisvar að húsinu á föstudag vegna framferðis mannsins. Móðir viðmælanda DV sá hann þá híma fyrir utan heimili sitt og yfirbragð hans var mjög sérkennilegt. „Hún sá ástæðu til að tékka á því hvort ekki væri allt í lagi hérna heima. Hann hefur samt aldrei ógnað neinum hér beinlínis en hann hefur samt vakið fólki ugg.“
Svo virðist sem átök mannanna tveggja hafi borist út fyrir húsið því foreldrar viðmælanda DV sáu hinn látna liggja á jörðinni fyrir utan húsið eftir að lögregla kom á vettvang. Sáu þau áverka á höfði hans. Segir maðurinn að þetta leggist mjög þungt á móður hans sem sé viðkvæm.
„Foreldrar mínir sjá manninn liggjandi látinn í jörðinni og strákurinn í járnum,“ segir maðurinn sem telur að lögregla hafi reynt að veita þolandanum fyrstu hjálp á vettvangi en án árangurs.
Maðurinn segist ekki vita til að hinn grunaði hafi verið í neyslu og telur vandamál hans stafa af öðru. Hann hefði fyrir löngu þurft að fá viðeigandi hjálp í heilbrigðiskerfinu.
„Lögreglan girti af einhver fimm hús, þar á meðal húsið sem ég bý í, en það eru engin ummerki núna, þeir gengu frá öllu í gærkvöld og tóku virkilega vel til eftir sig,“ segir maðurinn, en enginn ummerki sjást lengur um vinnu lögreglu á vettvangi sem gekk hratt og vel fyrir sig í gærkvöld.
„Það er sérkennilegt að sjá engan bíl lengur hérna í bílastæðinu. Hér voru borðar strengdir yfir í gærkvöld þegar ég kom heim,“ segir viðmælandi DV.
