Glerbrotum rigndi þegar maður gekk berserksgang aðfaranótt 1. mars, ofarlega á Laugavegi. Maðurinn var með járnrör í hendi sem hann lét dynja á bílum. Skemmdi hann nokkra bíla, þar á meðal þann sem meðfylgjandi myndir eru af.
Íbúar á hluta Laugavegar, við Njálsgötu og Barónsstíg, þekkja til mannsins en hann býr á opnu sambýli í hverfinu. Telja íbúarnir manninn hættulegan og hann eigi heima í öryggisvistun en ekki á sambýlinu þar sem hann býr. „Fólk er komið með upp í kok, þessi maður þarf öryggisvistun og ekkert minna,“ segir íbúi á svæðinu.
Íbúinn segir að maðurinn hafi brotið gluggarúðu heimili í hverfinu fyrir nokkrum vikum. „Honum var troðið inn á sambýli þar sem fíklar og alkar búa í sátt og samlyndi alla jafna.“ Segir konan ekki ganga að borgin losi sig við fólk inn á næsta sambýli þegar um sé að ræða einstaklinga sem þurfa önnur úrræði.
Í umræðuþræði í íbúahópi á FB staðhæfir ein kona að maðurinn hafi áður verið að skemma bíla á svæðinu:
„Ég held að það sé sami maður að gera þetta ítrekað – fyrir ekki svo löngu rústaði hann bílum með kúbeini og þar á meðal bíl sonar míns. Þar á undan gekk hann á húsin og braut rúður í þeim.“
Fleiri íbúar stíga fram og greina frá skemmdum á bílum sínum og birta myndir af þeim.