Alma íbúðafélag hefur boðað allt að 114 prósenta hækkun á húsaleigu til úkraínskra flóttamanna sem búa í fjölbýlishúsi að Urriðaholtsstræti 26 í Garðabæ. Stundin greinir frá.
Núverandi leigusali flóttamannanna er leigufélagið Einhorn en Alma tekur við í lok mars, þá rennur leigusamningurinn út. Um er að ræða 16 íbúðir og samkvæmt grein Stundarinnar verður meðalhækkun á leigunni 83 prósent.
Núverandi leigusali, Einhorn, er góðgerðarfélag sem ekki er rekið í hagnaðarskyni og hefur leigan verið hagstæð. Alma vill hins vegar fá markaðsverð fyrir leiguna.
Dæmi um hækkun sem Stundin tilgreinir er úr 170 þúsund krónum á 89 fermetra íbúð upp í 305 þúsund krónur.
Flóttamennirnir hafa fengið bréf þar sem þeim hefur verið gert að svara því fyrir 9. desember hvort þeir hyggist framlengja leigusamninginn.
Bæjarstjóri Garðabæjar, Almar Guðmundsson, hefur heitið því að bæjarfélagið muni koma flóttamönnunum til hjálpar og brúa bilið með einhverjum hætti.
Fasteignin er nú þegar í eigu Ölmu, sem keypti hana af fasteignafélaginu Kaldalóni í byrjun þessa árs. Alma ákvað að framleigja húsið til góðgerðarfélagsins Einhorns, sem gerði eins árs leigusamning við flóttamennina. Alma ætlar hins vegar að taka yfir leiguna þegar samningurinn rennur út, með fyrrgreindum afleiðingum, stórhækkun á leigu.
